#ວັນທີ 2 ກໍລະກົດ 2024, ຄະນະພັກຮາກຖານວິທະຍາໄລເຕັກນິກ-ວິຊາຊີບແຂວງຈຳປາສັກ ໄດ້ເປີດກອງປະຊຸມໃຫຍ່ ຄັ້ງທີ II ຂຶ້ນຢູ່ວິທະຍາໄລວິທະຍາເຂດ2 ຫຼັກ9 ເມືອງບາຈຽງຈະເລີນສຸກ ໂດຍການເປັນປະທານຮ່ວມຂອງສະຫາຍ ປະລິນຍາເອກ ສຸປານີ ສີລິປຸນໂຍ ຄະນະປະຈໍາພັກແຂວງ ຫົວໜ້າຄະນະໂຄສະນາອົບຮົມແຂວງ, ສະຫາຍ ສາທິດ ປັດສາພັນ ຮອງຫົວໜ້າຄະນະຈັດຕັ້ງແຂວງ, ສະຫາຍ ບົວໄຂ ສຸພາອອນ ເລຂາຄະນະພັກຮາກຖານວິທະຍາໄລເຕັກນິກວິຊາຊີບແຂວງຈຳປາສັກ ຊຸດທີ I,ສະຫາຍ ຄຳຜ່ອນ ລາດຊະວົງສາ ຮອງເລຂາຄະນະພັກຮາກຖານວິທະຍາໄລເຕັກນິກ-ວິຊາຊີບ ແຂວງຈຳປາສັກ, ສະຫາຍ ນາງ ລັດສະໄໝ ວໍລະຈິດ ເລຂາຊາວໜຸ່ມຮາກຖານວິທະຍາໄລເຕັກນິກວິຊາຊີບແຂວງຈຳປາສັກ ຕາງໜ້າອົງການຈັດຕັ້ງມະຫາຊົນ. ມີຄະນະຮັບຜິດຊອບບຸກຄະລາກອນຂັ້ນແຂວງ, ເລຂາໜ່ວຍພັກ - ຄະນະໜ່ວຍພັກທີ່ຂຶ້ນກັບຄະນະພັກຮາກຖານ, ສະມາຊິກສົມບູນ ແລະ ສໍາຮອງພາຍໃນຄະນະພັກຮາກຖານ ເຂົ້າຮ່ວມ.
#ໃນກອງປະຊຸມ, ສະຫາຍ ສາທິດ ປັດສາພັນ ຮອງຫົວໜ້າຄະນະຈັດຕັ້ງແຂວງ ໄດ້ຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການອະນຸມັດເປີດກອງປະຊຸມໃຫຍ່ ຄັ້ງທີ II ຂອງຄະນະພັກຮາກຖານວິທະຍາໄລເຕັກນິກວິຊາຊີບແຂວງຈຳປາສັກ. ຕໍ່ມາສະຫາຍ ບົວໄຂ ສຸພາອອນ ເລຂາຄະນະພັກຮາກຖານວິທະຍາໄລເຕັກນິກວິຊາຊີບແຂວງຈຳປາສັກ ສະໄໝທີ I ກໍໄດ້ກ່າວເປີດກອງປະຊຸມ. ຈາກນັ້ນ ສະຫາຍ ຄໍາຜ່ອນ ລາຊະວົງສາ ຮອງເລຂາຄະນະພັກຮາກຖານ ກໍໄດ້ຜ່ານບົດລາຍງານການເມືອງ ທັງ 2 ພາກ ໂດຍສະຫຼຸບຕີລາຄາຜົນການຈັດຕັ້ງປະຕິບັດການນໍາພາ - ຊີ້ນໍາຂອງຄະນະພັກຮາກຖານໃນ 5 ປີຜ່ານມາ (2019 - 2023) ໂດຍຍົກໃຫ້ເຫັນທີ່ຕັ້ງ, ພາລະບົດບາດ ແລະ ໂຄງປະກອບຂອງຄະນະພັກຮາກຖານ, ສະພາບການຈັດຕັ້ງປະຕິບັດວຽກງານແຕ່ລະດ້ານ ນັບແຕ່ດ້ານການເມືອງ - ແນວຄິດ, ວຽກງານການຈັດຕັ້ງ ແລະ ແບບແຜນການນໍາພາ, ການທາງດ້ານເສດຖະກິດ, ດ້ານວັດທະນາທໍາ - ສັງຄົມ, ການພົວພັນ - ຮ່ວມມືກັບຕ່າງປະເທດ ຕິດພັນກັບການປະຕິບັດໜ້າທີ່ວຽກງານວິຊາສະເພາະຂອງແຕ່ລະຂະແໜງການເຊິ່ງວິທະຍາໄລເຕັກນິກວິຊາຊີບ ໄດ້ສ້າງກໍາລັງແຮງງານໃຫ້ເປັນນາຍຊ່າງຊໍານານງານ, ຊ່າງເຕັກນິກ ແລະ ຜູ້ປະກອບກິດຈະການ ທີ່ມິທັກສະສີມື ສາມາດຕອບສະໜອງໃຫ້ແກ່ຕະຫຼາດແຮງງານ, ສະຖານປະກອບການ ພາກລັດ - ເອກະຊົນ ຕາມແຜນພັດທະນາເສດຖະກິດ - ສັງຄົມຂອງແຂວງ. ປັດຈຸບັນ ວິທະຍາໄລເຕັກນິກວິຊາຊີບ ມີພະນັກງານ, ຄູທັງໝົດ 140 ສະຫາຍ, ຍິງ 63 ສະຫາຍ, ໃນນັ້ນ ຄູສອນ 130 ສະຫາຍ, ຍິງ 57 ສະຫາຍ, ພະນັກງານບໍລິຫານ 10 ສະຫາຍ, ຍິງ 6 ສະຫາຍ. ໃນໄລຍະ 5 ປີຜ່ານມາ ໄດ້ຈັດການຮຽນ - ການສອນ ທັງໝົດ 24 ສາຂາວິຊາຮຽນ, ນອກນີ້ ຍັງໄດ້ຈັດການຮຽນ - ການສອນ ສາມັນວິຊາຊີບໃນ 4 ສາຂາອາຊີບ ຮ່ວມກັບໂຮງຮຽນສາມັນກິນນອນຊົນເຜົ່າ ແຂວງຈໍາປາສັກ, ມສ ຫົວແຊ, ມສ ພູບາຈຽງ ໂດຍໄດ້ຈັດການຮຽນ - ການສອນໃນຮູບແບບດັ້ງເດີມ, ຮູບແບບເນັ້ນສະມັດຕະພາບ ແລະ ຮູບແບບຄວບຄູ່ ແລະ ສາມາດສ້າງກໍາລັງແຮງງານອອກຮັບໃຊ້ສັງຄົມ ທັງໝົດ 4.555 ຄົນ, ຍິງ 1.690 ຄົນ ແລະ ໄດ້ມີວຽກເຮັດງານທຳ ກວມ 68%, ໄດ້ປະກອບກິດຈະການດ້ວຍຕົນເອງ ກວມ 24 % ແລະ ເປັນພະນັກງານລັດ 8%. ພ້ອມນີ້ ຍັງໄດ້ຍົກໃຫ້ເຫັນການນໍາພາວຽກງານອົງການຈັດຕັ້ງມະຫາຊົນ, ວຽກງານປ້ອງກັນຄວາມສະຫງົບຂອງສໍານັກງານ, ວຽກງານກໍ່ສ້າງພັກ - ພະນັກງານ, ວຽກງານກວດກາ - ປ້ອງກັນພັກ ແລະ ຜ່ານທິດທາງແຜນການ 5 ປີຕໍ່ໜ້າ. ຄະນະພັກຮາກຖານວິທະຍາໄລເຕັກນິກວິຊາຊີບແຂວງຈຳປາສັກ ມີ 5 ໜ່ວຍພັກທີ່ຂຶ້ນກັບ ຄື: ໜ່ວຍພັກບໍລິຫານ - ຈັດຕັ້ງ, ໜ່ວຍພັກກິດຈະການນັກສຶກສາ, ໜ່ວຍພັກວິຊາການ, ໜ່ວຍພັກພາກວິຊາບໍລິການ ແລະ ໜ່ວຍພັກພາກວິຊາອຸດສະຫະກໍາ, ມີສະມາຊິກພັກທັງໝົດ 70 ສະຫາຍ, ຍິງ 26 ສະຫາຍ, ໃນນັ້ນ ສະມາຊິກພັກສໍາຮອງ 10 ສະຫາຍ, ຍິງ 5 ສະຫາຍ. ພ້ອມນີ້, ຄະນະພັກຊຸດເກົ່າ ກໍໄດ້ຜ່ານບົດສຳຫຼວດ ແລະ ກ່າວລາໜ້າທີ່.
#ຕໍ່ມາ, ສະຫາຍ ສາທິດ ປັດສາພັນ ຮອງຫົວໜ້າຄະນະຈັດຕັ້ງແຂວງ ກໍໄດ້ຕາງໜ້າຄະນະປະທານ ຜ່ານມາດຖານເງື່ອນໄຂຜູ້ສະໝັກເລືອກຕັ້ງຄະນະພັກຮາກຖານວິທະຍາໄລເຕັກນິກວິຊາຊີບແຂວງຈຳປາສັກ ຊຸດໃໝ່ ພ້ອມທັງຜ່ານລາຍຊື່ຂອງຜູ້ສະໝັກ ເຊິ່ງມີ 9 ສະຫາຍ, ຍິງ 1 ສະຫາຍ, ໃນນັ້ນ, ເລືອກເອົາ 7 ສະຫາຍ. ຜ່ານຈາກການປ່ອນບັດເລືອກຕັ້ງ ແລະ ຜົນຂອງກອງປະຊຸມຄົບຄະນະຄັ້ງປະຖົມມະລືກ ໄດ້ເຫັນດີເປັນເອກະພາບ ເລືອກເອົາ ສະຫາຍ ຄໍາຜ່ອນ ລາດຊະວົງສາ ເປັນເລຂາຄະນະພັກຮາກຖານວິທະຍາໄລເຕັກນິກວິຊາຊີບແຂວງຈຳປາສັກ ຊຸດທີ II, ສະຫາຍ ຄໍາພົນ ຂັດຕິຍະວົງ ເປັນຮອງເລຂາ ແລະ ສະຫາຍ ສົມພູ ມັກຄະວານ ເປັນປະທານກວດກາຄະນະພັກຮາກຖານ ແລະ ຄະນະໜ່ວຍພັກຮາກຖານ4 ສະຫາຍ ຄື: ສະຫາຍ ສົມຄິດ ທາຍະໂສ, ສະຫາຍ ນາງ ແກ້ວອຸດອນ ພົມມະສຸລິດ, ສະຫາຍ ສີໃສ ສີທັກ ແລະ ສະຫາຍ ສີສຸກ ມອງດາວັນ. ຈາກນັ້ນ ກໍໄດ້ມອບຊໍ່ດອກໄມ້ໃຫ້ແກ່ຄະນະພັກຮາກຖານວິທະຍາໄລເຕັກນິກວິຊາຊີບແຂວງຈຳປາສັກ ຊຸດໃໝ່, ໃຫ້ກຽດມອບໂດຍ ສະຫາຍ ປະລິນຍາເອກ ສຸປານີ ສີລິປຸນໂຍ ຄະນະປະຈໍາພັກແຂວງ ຫົວໜ້າຄະນະໂຄສະນາອົບຮົມແຂວງ.
#ຕອນທ້າຍກອງປະຊຸມ, ສະຫາຍ ປະລິນຍາເອກ ສຸປານີ ສີລິປຸນໂຍ ກໍມີຄໍາເຫັນໂອ້ລົມຊີ້ທິດເຍືອງທາງ ໂດຍເນັ້ນໜັກໃຫ້ຄະນະພັກຮາກຖານວິທະຍາໄລເຕັກນິກວິຊາຊີບແຂວງຈຳປາສັກ ຊຸດໃໝ່ ສືບຕໍ່ຮັກສາມູນເຊື້ອດ້ານດີ, ເປັນເຈົ້າການສຶກສາອົບຮົມການເມືອງ - ແນວຄິດ, ປຸກລະດົມຂົນຂວາຍໃຫ້ສະມາຊິກພັກ, ພະນັກງານ, ເປັນເຈົ້າການສືບຕໍ່ເພີ່ມທະວີການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງສູນກາງພັກ, ມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງ, 2 ວາລະແຫ່ງຊາດທີ່ຜັນຂະຫຍາຍມາເປັນວາລະຂອງແຂວງ, ມາດຕະການແກ້ໄຂບັນຫາຄວາມຫຍຸ້ງ ແລະ ບັນຫາເຄັ່ງຮ້ອນດ້ານເສດຖະກິດ - ການເງິນ ກໍຄືມະຕິກອງປະຊຸມໃຫຍ່ ຄັ້ງທີ II ຂອງຄະນະພັກຮາກຖານວິທະຍາໄລເຕັກນິກວິຊາຊີບແຂວງຈຳປາສັກ ໃຫ້ບັນລຸຕາມຈຸດປະສົງ ແລະ ຄາດໝາຍທີ່ໄດ້ກໍານົດໄວ້. ນອກນີ້ ໃຫ້ເອົາໃຈໃສ່ເພີ່ມທະວີຄວາມຮັບຜິດຊອບຕໍ່ວຽກງານປັບປຸງກໍ່ສ້າງ - ຂະຫຍາຍພັກ ຢ່າງມີເປົ້າໝາຍ ແລະ ຮັບປະກັນການກໍ່ສ້າງພັກ ຕາມ 5 ຫຼັກການ, 3 ທິດນໍາ ເພື່ອເຮັດໃຫ້ການຈັດຕັ້ງພັກມີຄວາມປອດໃສ, ເຂັ້ມແຂງ ແລະ ໜັກແໜ້ນ ຢ່າງບໍ່ຢຸດຢັ້ງ.
